Es war emol e aldi Geiß, die hat siewe jungi Geißel ghat. Amol is die aldi Geiß in de Kleegarte gang angärtle. No hat se sich mitghol: des Soinesäckel, de Strohhut, es Hackl un de klaane Reche. Wie die aldi Geiß fortgang is, hat se iwer ihre Kiner gsaat, sie seile im Zimmer drinne bleiwe un die Tir net ufmache, sunscht kummt de Wolf un freßt se alli zamim. Un no is se gang.
Wie die aldi Geiß fort war, un no is de Wolf kumm, hat an dr Tir gekloppt und hat gruft: "Kinder, macht auf, eier Mutter is da!" Awer die Geißel han ghert an dr growi Stimm, daß es de Wolf is, un han gruft: "Du bischt net unser Mutter, unser Mutter hat e feinri Stimm!" No is de Wolf zum Zuckerbäcker gang un hat ihm Zucker verlangt un hat de Zucker gfreß, daßir e feinri Stimm kriet. No is de Wolf wieder zu die Geißel an die Tir gang un hat gruft: „Kinder, macht auf, eier Mutter is da!" No hat e Geißel gsaat: "Streck mol dei Protsche rein!" No hat de Wolf sei aandi Protsch neingstreckt, un wie die Geißel sei schwarzi Protsch gsiehn han, han se gschrie: "Du bischt net unser Mutter, unser Mutter hat net so schwarzi Protsche!"
Un no war de Wolf bees un is zum Bäcker gang, der soll ihm Mehl uf die Protsche drufstraue, daß'r ka schwarzi Protsche mehr hat. No hat de Bäcker ihm Mehl drufgstraut. Un no is de Wolf wieder zu die Geißel an die Tir gang un hat gruft: "Kinder, macht auf, eier Mutter is da!" No han die Geißel gsaat: "Streck mol dei Protsche rein!" No hat de Wolf sei weißi Protsche die Geißel neingstreckt, un aan Geißel hat die Tir ufgrieglt, un de Wolf is ins Zimmer neinghopst. Die armi Geißel sin so stark vrschrock un han sich alli gschwind vrstecklt: aans uners Bett, aans uner de Kaschte, zwai uner de Tisch, zwei uner die Stiehl, un es Kleinschti is in de Uhrkaschte gschluppt. De Wolf hat die Geißel alli gfangt un gfreß, nor des aandi, was in de Uhrkaschte gschluppt is, hat'r net gfreß.
Wie de Wolf die Geißel gfreß hat ghaat, is'r in de Wald neingang, hat sich uner e Baam hingleet un hat gschlof un gschnoricht, daß die Näschter vun die Bäänier gwacklt han.
Wie die aldi Geiß haamkumm is, hat se gruft: "Kinder, wu seid ihr?" No is des Klaani ausm Uhrkaschte rausghopst un hat gflennt un verzählt, daß de Wolf do war un hat se alli gfreß. No hat die aldi Geiß die großi Scher ghol, Nodl un Zwern un de Fingerhut un is mi'm klaane Geißel in de Wald, schaue, wu de Wolf is. Sie han ne gfun. Er war uner aam Baam glee un hat gschlof un gschnoricht, daß die Näschter gwacklt han owe. No is die aldi Geiß hin, hat mit'r großi Scher im Wolf sei Bauch ufgschnitt, un alli Gießel sin ausm Wolf sei Bauch rausghopst. No han se dicki Steener grafft, im Wolf sei Bauch neingetun und sei Bauch wieder zugnäht. No han se sich gschwind hiner die Bäämer im Wald vrstecklt, sie han gwart, wann de Wolf munter werd.
Uf aamol is de Wolf munter wor un hat sich gstellt. Die Steener in seim Bauch han stark grumpelt. No hat de Wolf Dorscht kriet un is an de Brunne gang Wasser saufe. Un wie'r sich am Brunne so neinloßt, sin die Steener in seim Bauch vorangrutscht un han de Wolf neingezoo in de Brunne. Un er is neingfall un vrsoff.
Un no is die aldi Geiß mit ihre siewe jungi Geißel haamgang, un sie ware alli froh mitzamm.
