Es Hinkl un der Houh sein auf der Mischthaufe scherre gang. Es Hinkl hat a Brotskrimmel gfun, der Houh awer a Nußschal. Er hat se gfreß, no is er verstickt. Dann hat's Hinkl e Gelruwewägel gmach, hat vier Läis un vier Fleh gfangt un eigspannt un is uf der hegschti Berg gang, far sei Houh begrawe.
No is die Gans zu ehm kumm un hat gsagt: "Hinkl, holscht mich aa mit?" "Hock dich rei un spann dich ei, dann darf seht aach mitfahre!" No is der Hund kumm un hat's Hinkl gfrogt: "Hinkl, wuhin fahrscht dann?" "Uf der hegschti Berg, mei Houh begrawe." "Hol mich aach mit!" "Hock dich rei un spann dich ei, dann därfscht aach mitfahre." Dann is die Katz kumm un hat gfrogt: "Holscht mich aach mit, Hinkl?" "Hock dich rei un spann dich ei, dann därfscht aach mitfahre." No is der Esl kumm un hat gsagt: "Hinkl, holscht mich aach mit?" "Hock dich rei un spann dich ei, dann därfscht aach mitfahre!"
No sein se in e Wald kumm. No hat's Hinkl gsagt: "Katz, krawwel mol uf der hegschti Boom un schau mol, ob ka Haus siehgscht!" Die Katz hat aarich weit e Licht gseh. No sein se drufzugang. Wie se nähgschter wäre, ham se e Haus gseh. Sie sein neigang un ham gfrogt, ob se kenne do iwer Nacht bleiwe. Des Weib vum Haus hat gsagt: "Jo, Ihr meßt Enk awer gut versteckle!" No ham se sich verstecklt: die Gans in de Lavour, die Fleh ins Handtuch, es Hinkl in der Rauchfang, die Katz in der Sparherd, die Läis ins Bett, der Hund hiner die Tir un der Esl in der Stall.
