Das Katzerl und das Mauserl sein miteinander auf die Reis' gangen. Da sein sie auf einmal zu einem großen Wasser kommen, über das nur a ganz schmales Brückerl gangen is. "Mauserl, geh du voran!" sagt 's Katzerl. "Nein, geh nur du voran!" sagt drauf das Mauserl.
- "Du mußt vorausgehn!" sagt wieder das Katzerl und das Mauserl hat richtig über die Brück'n vorausgeh'n müss'n. Wie sie in der Mitt'n auf der Brück'n war'n, das Mauserl voran, das Katzerl gleich hintennach, schwapps! hat das Katzerl dem Mauserl das Schwaferl abbiss'n.
Da hat 's Mauserl g'want und hat bitt': "Katzerl, gib ma mein Schwaferl wieder!" Das Katzerl aber hat g'sagt: "I gib da nit eh'nder dein Schwaferl, eh'st ma nit zum Keller geh'st und bringst mar an Kas!"
Da is das Mauserl zum Keller g'loffen und hat g'sagt: "Keller, mir Kas - Katz'n Kas - daß ma's Katzerl mein Schwaferl wieder gibt!"
Der Keller sagt drauf: "I gib da schon an Kas, aber du muaßt ma zum Schmied geh'n um a Messer!"
- Drauf is 's Mauserl glei zum Schmied g'rennt und hat bitt: "Schmied, mir Messer, Keller Messer, Keller mir Kas, Katz'n Kas, daß ma's Katzerl mein Schwaferl wieder gibt."
Da hat der Schmied g'sagt: "I gib da nit eh'nder a Messer, bis d' ma nit zum Bock gehst um a Horn!"
Hiaz hat 's Mauserl wieder lauf'n müass'n, bis 's zum Bock 'kommen is: "Bock, mir Horn, Schmied Horn; Schmied mir Messer, Keller Messer; Keller mir Kas, Katz'n Kas - daß ma 's Katzerl mein Schwaferl wieder gibt!"
Der Bock hat g'sagt: "I gib da schon a Horn, aber du muaßt ma zu da Wies'n geh'n um a Heu!"
Da is 's Mauserl zu der Wies'n g'loffen und hat g'sagt: "Wies'n, mir Heu, Bock Heu; Bock mir Horn, Schmied Horn; Schmied mir Messer, Keller Messer; Keller mir Kas, Katz'n Kas - daß ma 's Katzerl mein Schwaferl wieder gibt!"
Die Wies'n hat drauf g'sagt: "I gib da nit eh'nder a Heu, bis d' ma nit zur Donau gehst und bringst mar a Wasser!"
's Mauserl ist g'schwind zu der Donau g'loff n und hat recht schön bitt: "Donau mir Wasser, Wies'n Wasser; Wies'n mir Heu, Bock Heu; Bock mir Horn, Schmied Horn; Schmied mir Messer, Keller Messer; Keller mir Kas, Katz'n Kas - daß ma 's Katzerl mein Schwaferl wieder gibt!"
Drauf sagt die Donau: "I gib da nit eh'nder a Wasser, bis d' ma nit zur Braut gehst um a Kranzerl!"
Hiaz is 's Mauserl zu der Braut, g'loff n: "Braut mir Kranzerl, Donau Kranzerl; Donau mir Wasser, Wies'n Wasser; Wies'n mir Heu, Bock Heu; Bock mir Horn, Schmied Horn; Schmied mir Messer, Keller Messer; Keller mir Kas, Katz'n Kas - daß ma 's Katzerl mein Schwaferl wieder gibt!"
Die Braut war recht freundli und hat drauf g'sagt: "Ja, liab's Mauserl, i gebat dir schon a Kranzerl, aber i hab' kan Zwirn, den muaßt ma von alten Weiberl hol'n!"
Das Mauserl is zum alten Weiberl g'rennt und hat g'sagt: "Alt's Weiberl, mir Zwirn, Braut Zwirn; Braut mir Kranzerl, Donau Kranzerl; Donau mir Wasser, Wies'n Wasser; Wies'n mir Heu, Bock Heu; Bock mir Horn, Schmied Horn; Schmied mir Messer, Keller Messer; Keller mir Km Katz'n Kas - daß ma 's Katzerl mein Schwaferl wieder gibt!"
Das alte Weiberl sagt glei: "Ja, ja, i gib da schon an Zwirn, aber daweil i dir an hol', muaßt ma auf mein Schmalz obachtgeb'n, daß sa sie nit anbrennt, i tua grad Krapf'n bach'n; aber daß d' ma nit naschst!"
- "Nan, nan!" sagt 's Mauserl, "i nasch g'wiß nit!"
