's war amal an oami, bluatoami Bairin, de hot a Madl ghabt, und dös hot Annamirl ghoaßn. Amal, wia d' Annamirl in d' Schul gonga is, is a recht an oama oida Dattl daherkemma und hot s' bitt' um a bissl wos. Da Annamirl, dö eh als wia woachherzi woa, hot a daboamt, wäu na d' andan oli ausgheanzt ham. Sie is hergonga und hot eam vom Brot, was s' zan Fruahstuck ghobt hot, d' greßari Hälfti gebn.
Jetz is owa der Alti, hergonga und hot ihr drei scheni, scheni Dosna gebn und hot ihr gsagt, dass sie s', ehenda drei Joahr vurbei san, nit aufwocha derf.
D'Annamirl hot de Dosna gnumma, und da Alti is vaschwundn. Wia bald drei Joahr um woan, is d' Muada gstorbm, und d' Annamirl hot a besi, besi Stiafmuada kriagt. Da hot d' Annamirl weida nit gwoant und 's is ihr als wia hoat gscheh'gn. D' Stiafmuada hot's nit amal leidn kinna, wann s' gwoant hot und hot s' oiwäu a raunzats Mensch ghoaßn. Und orwatn hot s' miassn so schwa, dass sie si nimma auskennt hot.
Amal hot s' goa miassn a Kloadl mocha, dös so glanzat woa wia d' Sunn. Weil s' des not kinna hot, hot s' halt zan Woana angfangt, dass schia an Stoa het dabarma kinna.
Do auf amal san ihr dö drei Dosna eingfalln, de s' z'schenka kriagt hot, und si is glei hergonga, is hoamgrennt und hot d' ersti aufgmocht. Wia hot's' owa gschaut, wia s' a schens Kloadl außazogn hot, dös so glanzat woa wia d' Sunn. Volla Freid hot s' des gnumma und is zu da Stiafmuada grennt und hot ihr's gebn.
De hot owa weida not gschnauzt, wia s' des gsehgn hot; und weil s' schiach worn is, hot s' ihr glei gsogt, sie soll a Leinwand spinna, de soll fufzig Elln broat sein und soll si durch an Fingaring durchiziagn lossn.
D' Annamirl is jetz hergonga und hot d' zweiti Dosn aufgmocht und hot a Leinwand außazogn, de woa fufzig Elln broat und hot si durch an Ring so guat durchiziagn lossn, als ob's nix wa. Volla Freid hot sie's da Stiafmuada brocht. Dö ona is fuchti worn driwa, weil s' glaubt hot, d' Annamirl het's gspunna; und sie hot ihr gsogt, si soll a Gschloss baun ganz aus Glas, so hoch wia da hechsti Berg.
D' Annamirl is jetz hergonga, hot d' letzti Dosn gnumma, is außigonga und hot s' wolln aufmocha, da is's ihr auf amal owagfalln, und statt da Dosn is 's Gschloss da gwest, ganz aus Glas, und dös woa so hoch als da hechsti Berg.
Wia dös d' Stiafmuada gsehgn hot, is s' außikemma und iwa d' Stiagn aufigrennt. Wia s' owa obn woa, is s' ausgruscht, owigfalln und hot si 's Gnack brocha.
